2012年1月7日 星期六

同人死亡筆記-乜嘢係版權擁有人(文)

香港原先嘅版權條例,已經唔係保障「作者」,亦都已經對二次創作非常有敵意。係咁,今次嘅修訂草案,點解仲衰咗?
其中一點,就係以前只有由版權擁有人提出訴訟。但係修訂後,政府就可以主動提出訴訟,連版權擁有人都跳過。
未修訂前,告唔告嘅權利係喺版權擁有人手上。如果版權擁有人好嘅,理解創作文化有咩需要,佢唔對二次創作提出控告。就例如日本同人界,就係因爲漫畫嘅版權擁有人——出版社嘅默許,唔對同人界提控,先有今日咁百花齊放嘅局面。咁係全靠日本嘅漫畫界明白「二次創作」嘅重要性,保護同人界呢個創作搖籃嘅空間同埋自由度。
而家港府嘅修訂,正正就係連版權擁有人都可以跳過。政府可以主動提出檢控,唔使諮詢版權擁有人!即係話,就算而家版權擁有人畀空間你,但係第時呢個空間都可能冇埋,政府可以主動告你、拉你!
政府官員一味重複話「而家有嘅二次創作,第時都一樣有」。問題係:有,咁政府你告唔告?結果官員從來冇保證過唔告!

沒有留言:

張貼留言