2012年2月8日 星期三

同人死亡筆記-貶損性處理(文)

所謂「貶損性處理」列咗做侵權犯法,絕對係離譜離罩到唔識形容!絕對係爲咗針對惡搞同二次創作而夾硬屈出嚟嘅「莫須有」式法例,欲加之罪,何患無辭!
連張錦輝解釋完咩叫「貶損性處理」之後,喺同一段片入面,叫大家學習嘅「港人之光」——許誠毅嘅《史力加》,亦都係惡搞咗好多童話。張署長擧個倒自己米嘅例子,證明佢本人幾無知!
如果《史力加》唔係夢工場出品嘅,而係冇錢解決版權問題嘅香港小市民整嘅,係咁呢套嘢嘅創作人仲唔衰貶損性處理?!洗定八月十五等坐監都得啦!
大家又睇到,呢個問題唔會發生喺玩得起巨額金錢買授權遊戲嘅大商家身上。一般升斗小民,做同人、做非商業創作又好,做惡搞諷刺又好,齊齊中晒招喇。
咪話唔諷刺,香港人成日鬧大陸保守,但係胡戈將《無極》惡搞成《一個饅頭的血案》。陳凱歌大大聲話要告佢,大陸嘅法律學者同版權署都紛紛發言,指出胡戈嘅惡搞,根據大陸嘅法律係合法嘅!最後冇咩勝算嘅陳凱歌縮沙,冇告胡戈。大陸市民可以二次創作,香港反而唔得,死未!

沒有留言:

張貼留言