2012年2月20日 星期一

同人死亡筆記-對同人誌嘅影響(文)

之前講到,二次創作幫個原作帶嚟嘅商業利益,政府從來扮盲咗眼睇唔見,二次創作會唔會有咩「潛在」經濟損害,政府就算到盡,雙重標準輸打贏要,處事一啲都唔fair。呢一點,對同人創作好蝕底。
而我哋更加擔心嘅係喺同人展銷會入面「銷售」同人誌嘅模式,分分鐘會畀政府抽水,將呢種非商業創作,老屈做商業侵權。
一本同人誌要花咁多心力製作,冇可能免費變出嚟,檔租、印刷同製作成本等等,全部都要作者自己嘔錢出嚟付出。同人展銷會嘅所謂「銷售」,只係大家同好間互相支持,去幫補一吓上述嘅成本開支唧。當中十個有九個都係蝕,要自己再貼錢去支持呢種創作嘅興趣,淨低嗰一個維到本已經好勁。眞係賣到發達嘅,喺香港有冇邊個例子吖?
要賣到賺,日本有啲「大手」就得嘅。但係日本都冇禁,相反仲希望有多啲同人,幫原作宣傳多啲。反正就算有人賣同人賺錢,原作都唔會因此而蝕咗。買得同人都好自然會支持原作。講日本漫畫,日本嗰邊先係個眞正原作者。人哋都唔禁,你香港政府立呢啲屎法,絕對係枉作小人!

沒有留言:

張貼留言